ನಾಲ್ಕು ಮಾತು

ಚಿತ್ರ ಕೃಪೆ:: http://joker84.deviantart.com

ನೂರಾರು ಬೆಳಕುಗಳ ನೂಲಿರದ ಹಗ್ಗಕ್ಕೆ
ಹಿಗ್ಗಾ ಮುಗ್ಗಾ ಜಗ್ಗುವ ಕುದುರೆಯಾಗಿ
ತಡವರಿಸಬೇಡ.


ನೂರು ಧ್ವನಿವರ್ಧಕದ ಮಾತುಗಳ  ಸೆಳೆತಕ್ಕೆ
ನಿನ್ನ ಕಿವಿಯೊಡ್ಡುತ್ತ, ನಿನ್ನ ಒಳಗಿನ ದನಿಗೆ
ಕಿವುಡಾಗಬೇಡ.


ಅವರಿವರ ಬಾಲವನ್ನೇ ನಿನ್ನ ಗದೆಯೆಂದು
ಹೆಗಲಲ್ಲಿ ಹೊತ್ತು, ಬಂದಳಿಕೆ ಭೀಮನ ಪಾತ್ರ
ವಹಿಸಬೇಡ.


ನಿನ್ನೊಳಗನ್ನು ನೀನೆ ಅಗೆದು, ತೆಗೆದು,
ಕಮ್ಮಟದ ಕುಲುಮೆ ಬೆಂಕಿಗೆ ಹಿಡಿದು
ನಿನ್ನಿಷ್ಟಕ್ಕೆ ತಕ್ಕಂತೆ ಎರಕ ಹೊಯ್ಯುವವರೆಗೂ
ತೆಪ್ಪಗಿರಬೇಡ.


                                      - ಜಿ ಎಸ್ ಶಿವರುದ್ರಪ್ಪ
                            ('ಗೋಡೆ' ಕವನ ಸಂಕಲನದಿಂದ)