ರಸಪ್ರಯೋಜನ ಭುವನಂ ಕವನಂ:
ಭಗವಂತನೆ ಕವಿ, ಸಹೃದಯನಾಂ!
ಬಾನೋ ಬಯಲೋ ಕಾಡೋ ಮಿಗವೋ
ಮಣ್ಣಿನೊಳಾಡುವ ಮುದ್ದಿನ ಮಗುವೋ,
ಹಕ್ಕಿಯ ಗೂಡಿನ ಮುತ್ತಿನ ಮೊಟ್ಟೆಯೊ
ಮಿಂಚುವ ಚುಕ್ಕಿಯ ರೆಕ್ಕೆಯ ಚಿಟ್ಟೆಯೊ,
ಅಲೆ ಅಲೆ ಏರಿಳಿಯುವ ಮಲೆಬೆಟ್ಟವೊ
ಹೂವಕ್ಕಿಯ ಇಂಚರ ಟೂವ್ವಿಟ್ಟುವೊ, -
ರಸಪ್ರಯೋಜನ ಭುವನಂ ಕವನಂ:
ಭಗವಂತನೆ ಕವಿ, ಸಹೃದಯನಾಂ!
ಹೊನಲೋ ಹೊಳೆಯೋ ತಳಿರೋ ತರುವೋ
ಕೆಚ್ಚಲ ಕರುವನು ನೆಕ್ಕುವ ತರುವೋ,
ಮುಳುಗುವ ನೆಸರೊ ಮೂಡುವ ತಿಂಗಳೊ
ಚೆಲುವಿನ ಹೆಂಗಳೊ ಒಲವಿನ ಕಂಗಳೊ,
ಆನೆಯೊ ಸಿಂಹವೊ ಮೊಸಳೆಯೊ ಮೀನೋ
ಉಗ್ರವೊ ಸಾಧುವೊ ಎಂತೋ ಏನೋ -
ರಸಪ್ರಯೋಜನ ಭುವನಂ ಕವನಂ:
ಭಗವಂತನೆ ಕವಿ, ಸಹೃದಯನಾಂ!
ಅಲ್ಪವೊ ಭುಮವೊ ಹಿರಿದೋ ಕಿರಿದೋ
ಸಿಹಿಯೋ ಕಹಿಯೋ ಬಿಳಿದೋ ಕರಿದೋ,
ಬಂಜರು ಮಳಲೋ ಹಲುಸಿನ ಹೊಳಲೋ
ಬರವೋ ಸಾವೋ ಕದನದ ನೋವೋ,
ನೆಲೆಗೆಟ್ಟಲೆವಾ ಜನತೆಯ ಬೇವೋ,
ಲೀಲಾಪ್ರಜ್ಞೆಗೆ ಸರ್ವಂ, ಓವೋ!-
ರಸಪ್ರಯೋಜನ ಭುವನಂ ಕವನಂ:
ಭಗವಂತನೆ ಕವಿ, ಸಹೃದಯನಾಂ!
-ಕುವೆಂಪು
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ
ನಿಮ್ಮ ಉನ್ಮಾದದ ನಶೆ ನಮ್ಮೊಂದಿಗಿಷ್ಟು ಹಂಚಿಕೊಳ್ರಿ....